واشنگٹن(این این آئی)امریکی انتظامیہ کے عہدیداروں نے کہاہے کہ ایران پر عاید کردہ تازہ اقتصادی پابندیوں کو موثر، نتیجہ خیز اور کامیاب بنانے کے لیے 20 ممالک پر مشتمل بین الاقوامی محاذ قائم کیا گیا ہے۔ ایران کے خلاف پابندیاں بھرپور طریقے سے نافذ کی جائیں گی۔عرب ٹی وی کے مطابق امریکی حکام نے کہاکہ ایران کے خلاف منظور کردہ نئی پابندیاں پہلے بھی رہ چکی ہیں۔ ایران کے ساتھ
جوہری معاہدے طے پانے کے بعد انہیں اٹھا لیا گیا تھا، تاہم حال ہی میں صدر ٹرمپ کی جانب سے ایران کیساتھ طے پائے جوہری معاہدے سے علیحدگی کے بعد سابقہ پابندیاں بہ تدریج بحال کرنے کا اعلان کیا تھا۔امریکی انتظامیہ کے عہدیداروں کا کہنا تھا کہ رواں ہفتے امریکی صدر ڈونلڈ ٹرمپ ایران پر مزید سخت پابندیاں عاید کرسکتے ہیں اور ان پابندیوں کے ایران کی معیشت پر گہرے منفی اثرات مرتب ہوں گے۔
