دمشق(این این آئی)شامی کردوں نے کہا ہے کہ عفرین کی لڑائی کا ایک نیا باب شروع ہو گیا ہے۔اب آمنے سامنے جنگ شروع ہوگی،ہماری فورسز علاقے میں پھیلی ہوئی ہیں اورترک اہداف کو نشانہ بنائیں گی، یہ بیان ایک ایسے وقت پر دیا گیا ہے، جب ترک فورسز نے حامی ملیشیا گروہوں کے تعاون سے شمالی شام کے شہر عفرین کا قبضہ سنبھال لیا ہے۔
غیرملکی خبررساں ادارے کے مطابق اس علاقے کی کرد انتظامیہ نے ایک بیان میں کہا کہ اب جنگجو براہ راست لڑائی کے بجائے گوریلا جنگ شروع کریں گے۔ عفرین ایگزیکٹیو کونسل کے شریک چیئرمین عثمان شیخ عیسیٰ نے کہا کہ ان کی فورسز علاقے میں پھیلی ہوئی ہیں اور ترک اہداف کو نشانہ بنائیں گی۔ دو ماہ کی لڑائی کے بعد ترک فورسزعفرین میں ان کرد باغیوں کو پسپا کرنے میں کامیاب ہوئی ہیں۔
