مکہ مکرمہ(این این آئی) ڈپٹی گورنر شہزادہ عبداللہ بن بندر نے آب زمزم کے توسیعی منصوبے کا جائزہ لیا اور کام کے معیار کی تعریف کی ۔ اس موقع پر ادارہ امور حرمین کے ڈائریکٹر شیخ ڈاکٹر عبدالرحمان السدیس کے علاوہ دیگر اعلی عہدیدار بھی موجود تھے ۔عرب ٹی وی کے مطابق منصوبے کے ڈائریکٹر نے بتایا کہ آب زم زم کا توسیعی منصوبہ 90 فیصد مکمل ہو چکا ہے ماہ رجب کے آخر تک مکمل ہو جائے گا۔
جس کے بعد حرم شریف کا مطاف پوری طری کھول دیا جائے گا ۔ ڈپٹی گورنر نے شہزادہ عبداللہ نے وزارت مالیات اور حرمین جنرل پریذیڈنسی کے علاوہ وہاں کام کرنے والوں کی تعریف کرتے ہوئے کہا کہ وزارت مالیات نے توسیعی منصوبے کو جتنی اہمیت دیتے ہوئے فوری طور پر اسے جاری کروایا یہ اس امر کا واضح ثبوت ہے کہ خادم حرمین شریفین کی حکومت زائرین حرم کے آرام و سکون کو اولیت دیتی ہے ۔ امور حرمین اور زم زم پروجیکٹ کی انتظامیہ نے ڈپٹی گورنر کو بتایا کہ توسیعی منصوبے میں 96 فیصد سعودی انجیئنر کام کررہے ہیں جبکہ اس کام کا دورانیہ 10 لاکھ سے زائد گھنٹے کا ہے ۔ منصوبے کے ذریعے 693 طلبا کو بھی عملی تربیت دی گئی جن کا تعلق مملکت کی 16 یونیورسٹیوںسے ہے ۔ ان طلباء کو منصوبے پر کام کرنے والے مستندانجینیئرزکے ساتھ عملی تربیت کا انتظام کیا گیا ۔
