واشنگٹن(این این آئی)امریکا میں استانی نے پانچ سالہ بچے کو مسلمان ہونے پر تشدد کا نشانہ بنا ڈالا ،غیرملکی خبررساں ادارے کے مطابق شمالی کیرولینا میں واقع چارلوٹ میکلن برگ ایلیمنٹری اسکول میں استانی نے پانچ سالہ بچے کو مسلمان ہونے پر گردن سے پکڑ کر تشدد کا نشانہ بنایا ۔اس سلسلے میں کونسل ان امریکن اسلامک ریلیشنز نے واقعے کی تحقیقات کا مطالبہ کیا۔ واضح رہے کہ ڈونلڈ ٹرمپ کے صدر منتخب ہونے سے لیکر اب تک نفرت پر مبنی جرائم کا یہ سب سے تازہ واقعہ ہے۔
جبکہ دوسری جانب امریکا میں مسلمانوں کے درمیان اس امر پر تشویش کی لہر دوڑ گئی ہے کہ انہیں حال ہی میں ممکنہ طور پر کڑی نگرانی کا نشانہ بنایا گیا ہے۔مسلمانوں کو خود کار ٹیلی فون کالیں موصول ہوئی تھیں جن میں مطالبہ کیا گیا کہ مسلمان ہونے کی صورت میں 1 دبائیں اور غیر مسلم ہونے پر 2 کا بٹن دبائیں۔میڈیارپورٹس کے مطابق بہت سے حلقوں میں یہ اندیشہ بھی اجاگر ہو رہا ہے کہ شاید نو منتخب صدر ڈونلڈ ٹرمپ نے اپنے انتخابی وعدے پر عمل شروع کر دیا ہے جس میں انہوں کہا تھا کہ امریکا میں تمام مسلمانوں کا اندراج کیا جائے گا۔مسلمانوں کو موصول ہونے والی کالیں درحقیقت ایک غیر منافع بخش تنظیم’’یو ایس اے ایمرج‘‘کی جانب سے کرائے جانے والے سروے کا حصہ ہیں۔