اسلام آباد (نیوز ڈیسک) متحدہ عرب امارات میں کیے گئے فلکیاتی تجزیوں کے مطابق رمضان المبارک 2026 کے آغاز کی ممکنہ تاریخ 19 فروری بتائی جا رہی ہے، جبکہ اسلامی مہینے رجب 1447 ہجری کا آغاز 21 دسمبر 2025 سے ہونے کا امکان ظاہر کیا گیا ہے۔

مصر کے نیشنل ریسرچ انسٹی ٹیوٹ آف فلکیات و جیو فزکس کے سربراہ ڈاکٹر طہ رباح کے مطابق رجب کا نیا چاند 20 دسمبر کو قاہرہ کے مقامی وقت کے مطابق صبح 3 بج کر 45 منٹ پر پیدا ہوگا۔ ان کا کہنا ہے کہ اسی دن چاند نظر آنے کے امکانات بھی موجود ہیں۔

فلکیاتی ماہرین کے مطابق مکہ مکرمہ میں سورج غروب ہونے کے بعد چاند تقریباً 14 منٹ تک افق پر موجود رہے گا، جبکہ قاہرہ میں اس کا دورانیہ قریباً 10 منٹ ہوگا۔ عرب اور دیگر اسلامی ممالک کے مختلف دارالحکومتوں میں چاند کی رویت کا وقت 1 سے 26 منٹ کے درمیان رہنے کی توقع ہے، البتہ ترکی کے دارالحکومت انقرہ میں چاند سورج کے ساتھ ہی غروب ہو جائے گا۔

رمضان المبارک 2026 کے ممکنہ آغاز کے حوالے سے بھی بتایا گیا ہے کہ یو اے ای میں کیے گئے فلکیاتی اندازوں کے مطابق یہ مہینہ 19 فروری سے شروع ہو سکتا ہے، تاہم اس کی حتمی تاریخ کا اعلان 29 شعبان کو سعودی عرب میں چاند دیکھنے کے بعد کیا جائے گا۔

ماہرین کے مطابق رمضان 2026 کے دوران روزے کا دورانیہ مختلف ممالک میں مختلف ہوگا۔ ابتدائی ایام میں روزہ تقریباً 12 گھنٹوں پر مشتمل ہوگا، جبکہ مہینے کے آخری دنوں میں اس کا دورانیہ بڑھ کر تقریباً 13 گھنٹے تک پہنچ سکتا ہے۔