نئی دہلی(این این آئی)بھارت کے وزیر داخلہ راج ناتھ سنگھ نے کہا ہے کہ نادانستہ طور پر سرحد پار کرکے پاکستان جانے والے ہندوستانی فوجی کی رہائی کے لیے ہر ممکن کوشش کی جارہی ہے۔بھارتی میڈیا کے مطابق راج ناتھ سنگھ نے اندرونی سیکیورٹی صورتحال سے متعلق ایک اہم اجلاس کی صدارت کے بعد میڈیا سے بات کرتے ہوئے کہا کہ بھارتی فوجی کی محفوظ رہائی کے لیے ہر ممکن کوششیں کی جائیں گی۔ان کا کہنا تھا کہ نئی دہلی فوجی اہلکار کی جلد از جلد رہائی کے لیے اس معاملے کو اسلام آباد کے ساتھ اٹھائے گا۔غیر ملکی میڈیا نے بھی بھارتی فوجی کے گرفتار ہونے کی تصدیق کی اور انڈین آرمی افسر کا حوالہ دیتے ہوئے کہا کہ ہتھیار سے لیس 37 راشٹریہ رائفلز کا ایک فوجی اہلکار ‘نادانستہ’ طور پر سرحد عبور کرکے پاکستان میں داخل ہوگیا تھا۔ان کا کہنا تھا کہ غلطی سے سرحد عبور کر جانے کے واقعات، دونوں جانب سے ماضی میں بھی پیش آچکے ہیں اور ایسے افراد کو واپس لوٹا دیا جاتا ہے۔