سرینگر(این ا ین آئی)بھارت نے دو بریگیڈ ز پر مشتمل مزید دس ہزار فوجی کنٹرول لائن پر پہنچا دیے ہیں۔ کشمیر میڈیا سروس کے مطابق ایک بریگیڈ ہماچل پردیس کے علاقے دھرم شالہ سے جبکہ ایک اور جموں خطے کے علاقے ادھمپور سے مقبوضہ علاقے میں پہنچائی گئی۔ مقبوضہ وادی کے جنوبی اضلاع پلوامہ ،کولگا م ، شوپیاں وغیرہ میں بھارت مخالف مظاہروں پر قابو پانے کے لیے حال ہی میں ایک بریگیڈ تعینات کی گئی تھی۔ یا درہے کہ حال ہی میں مقبوضہ علاقے میں ضلع بارہمولہ کے علاقے اوڑی میں نامعلوم حملہ آوروں کے ہاتھوں 17بھارتی فوجیوں کی ہلاکت کے بعد بھارت کے سر پر سخت جنگی جنوں سوار ہے اور وہ مقبوضہ کشمیر میں جاری انتفادہ سے اقوام عالم کی توجہ ہٹانے کے لیے اس حملے کا ذمہ دار پاکستان کو ٹھہرا رہا ہے۔