بغداد(این این آئی) دہشت گرد تنظیم ’اسلامک اسٹیٹ‘ کے خلاف امریکی عسکری اتحاد کے کمانڈر لیفٹیننٹ جنرل اسٹیفن ٹاؤنزینڈ نے کہاہے کہ عراق کے دوسرے بڑے شہر موصل کی بازیابی کی لڑائی جلد شروع کی جا رہی ہے۔ دہشت گرد تنظیم ’اسلامک اسٹیٹ‘ کے خلاف امریکی عسکری اتحاد کے کمانڈر لیفٹیننٹ جنرل اسٹیفن ٹاؤنزینڈ نے امریکی جرید ے کو دیئے گئے ایک انٹرویومیں موصل کی بازیابی کا آپریشن شروع کرنے کی کوئی حتمی تاریخ البتہ نہیں بتائی۔ جنرل ٹاؤنزینڈ کو گزشتہ ماہ اِس عسکری اتحاد کا کمانڈر مقرر کیا گیا تھا۔ انہوں نے امید ظاہر کی کہ یہ لڑائی اکتوبر کے اوائل میں شروع ہو سکتی ہے۔ دوسری جانب عراقی سکیورٹی ذرائع کا کہنا تھا کہ ’اسلامک اسٹیٹ‘ سے موصل کا قبضہ چھڑانے کا آپریشن رواں مہینے میں شروع ہونے کا قوی امکان ہے۔