نیو یارک (یواین پی)امریکی محققین کے مطابق بچوں اور شریک حیات کے بجائے دوستوں کے ساتھ وقت گزارنے سے انسان زیادہ خوش رہ سکتا ہے۔ امریکی یونیورسٹی ‘ایس ایم یو’ کے تحت کی گئی تحقیق میں یہ بات سامنے آئی ہے کہ دوستوں کے ساتھ زیادہ وقت گزارنے والے افراد کی صحت بہتر ہوتی ہے۔

نفسیات کے پروفیسر نیتھن ہڈسن کی جانب سے کی گئی اس تحقیق کے مطابق شریک حیات کے ساتھ زیادہ تر وقت گزارنے والے افراد سب سے کم خوش رہتے ہیں۔پروفیسر نیتھن ہڈسن کے مطابق خوش رہنے کا تعلق کسی مخصوص شخصیت سے نہیں بلکہ ان سرگرمیوں سے ہے جو کسی کے ساتھ مل کر کی جاتی ہیں۔شخصیت اور نفسیات سے متعلق امریکی جرنل میں شائع ہونے والی اس تحقیق میں کہا گیا ہے کہ اکثر اوقات لطف انگیز سرگرمیاں اپنے دوستوں کے ساتھ ہی کی جاتی ہیں جبکہ اہل خانہ کے ساتھ روز مرہ کے کام نمٹانے میں وقت گزر جاتا ہے۔پروفیسر ہڈسن کا کہنا ہے کہ اگر بچوں اور شریک حیات کے ساتھ بھی لطف انگیز سرگرمیوں میں مشغول ہوا جائے تو ایسا کرنا یقیناً خوشی کا باعث ہوتا ہے۔تحقیق کے نتائج چار سو سے زائد افراد کے تجربات پر مبنی ہیں جن سے دوستوں اور اہل خانہ کے ساتھ بتائے گئے لمحات سے متعلق سوالات پوچھے گئے تھے۔