راولپنڈی (این این آئی)راولپنڈی کے بے نظیر بھٹو ہسپتال میں والدین کو اصل بچے کی جگہ انتقال شدہ بچہ تھمادیا گیا، تدفین کے وقت بچے کے ہاتھ میں کڑا دیکھ کر حقیقت کھلی، تحقیقات کے بعد ہسپتال انتظامیہ نے والدین کو اصل بچہ واپس کر دیا۔

نجی ٹی وی کے مطابق راولپنڈی کے بینظیر بھٹو ہسپتال کے شعبہ اطفال میں بچہ تبدیل ہونے کا واقعہ پیش آیا ہے۔ذرائع کے مطابق اعجاز اور اس کی اہلیہ 3 دن کے بچے کو حویلیاں سے بینظیر ہسپتال لائے تھے، شعبہ پیڈز کے ڈاکٹر نے بچے کو ہیپاٹائٹس کا مریض بتا کر ایمرجنسی میں داخل کردیا، جس کے کچھ دیر بعد خون سے لت پت مردہ بچے کی لاش اہلخانہ کو دے کر اسپتال سے ڈسچارج کردیا گیا۔اعجاز اور اس کی اہلیہ نے بچے کی تدفین حویلیاں میں کردی، بچے کا کڑا چیک کیا گیا تو اس پر بچے کی والدہ کے بجائے کسی اور خاتون کا نام تھا، جس کے بعد بچے کے والدین نے ہسپتال پہنچ کر احتجاج کیا۔ذرائع کے مطاق ہسپتال انتظامیہ نے تحقیقات کیں تو پتا چلا بچہ تبدیل ہوگیا ہے، ہسپتال انتظامیہ نے 24 گھنٹے بعد والدین کو اْن کا بچہ حوالے کر دیا۔ہسپتال انتظامیہ کا کہنا ہے کہ بچے کی اس تبدیلی اور اس میں ہونے والی غفلت کی تحقیقات کر رہے ہیں۔