لاہور: پاکستان کرکٹ بورڈ کے موجودہ سربراہ شہریار خان کا کہنا ہے کہ سعید اجمل کو ورلڈ کپ سکواڈ میں شامل نہیں کیا جا سکتا، لیکن بورڈ کے سابق سربراہ اعجاز بٹ سٹار آف سپنر کو سکواڈ میں دیکھنے کے خواہش مند ہیں۔
انٹرنیشنل کرکٹ کونسل کی جانب سے اجمل کا باؤلنگ ایکشن کلیئر قرار دیے جانے کے بعد ہفتہ کو ڈان سے گفتگو میں شہریار کا کہنا تھا ‘اجمل نے پہلا مرحلہ طے کر لیا ہے لیکن دوسرا ابھی باقی ہے۔ انہیں ثابت کرنا ہو گا کہ وہ باؤلنگ ایکشن میں تبدیلی کے بعد بھی پہلے کی طرح ایک موثر سپنر ہیں’۔
‘اجمل کوقومی ٹیم میں واپس آنے کیلئے پہلے ڈومیسٹک کرکٹ کھیلا ضروری ہے’۔
جب شہریار سے پوچھا گیا کہ آیا آسٹریلیا میں موجود ٹیم انتظامیہ نے بورڈ کو پیغام دیا ہے کہ اجمل کا ایکشن کلیئر ہونے کے باوجود سکواڈ کو ان کی ضرورت نہیں، تو شہریار نے ہاں میں جواب دیا۔
‘پی سی بی نے جنید خان کے فٹنس ٹیسٹ میں ناکامی کے بعد ایک تجویز پر غور کیا تھا کیونکہ تکنیکی بنیادوں پر ہمیں ٹیم میں تبدیلی کرنے کا حق ہے’۔
‘ہم نے ٹیم انتظامیہ کے ساتھ مل کر سوچا تھا کہ آئی سی سی رپورٹ کلیئر آنے کی صورت میں اجمل کو جنید کے متبادل ٹیم میں شامل کیا جا سکتا ہے، تاہم ٹیم نے یہ تجویز رد کر دی’۔
‘ٹیم انتظامیہ کا خیال تھا کہ جنید کی جگہ کسی فاسٹ باؤلر کو آنا چاہیئے، اسی وجہ سے راحت علی کو سکواڈ میں شامل کیا گیا’۔
شہریار کے مطابق، وہ متبادل کھلاڑی منتخب کرنے کے حوالے سے ٹیم انتظامیہ کے فیصلے کی قدر کرتے ہیں۔
دوسری جانب، اعجاز بٹ نے ٹیم انتظامیہ کے رویہ پر حیرت کا اظہار کیا۔
‘میرے خیال میں اجمل کوایکشن کلیئر ہونے کے بعد سکواڈ میں شامل کر لینا چاہیے تھا ۔ ٹیم انتظامیہ کا انہیں نظر انداز کرنا درست نہیں’۔
پی سی بی کے سابق سربراہ نے مزید کہا ‘ہمارا باؤلنگ اٹیک موجودہ حالت میں مضبوط دکھائی نہیں دیتا اور اجمل کی شمولیت سے اسے توقیت مل سکتی تھی’۔
آسٹریلیا میں وہاب ریاض، سہیل خان اور آل راؤنڈر محمد حفیظ کے فٹنس مسائل کی خبروں پر اعجاز بٹ نے کہا ‘پی سی بی اجمل کو سکواڈ میں شامل کرنے کیلئے آ ئی سی سی سے تکنیکی بنیادوں پرایک اور تبدیلی کی درخواست کر سکتی ہے’۔
شہریار خان نے ٹیم انتظامیہ کے حوالے سے بتایا کہ وہاب اور حفیظ معمولی فٹنس مسائل کا شکار ہیں اور جلد ہی صحت یاب ہو جائیں گے۔
