پاکستان تحریک انصاف نے کراچی کی طرح لاہور کو بند کرنے کیلئے منظم حکمت عملی طے کر لی ہے۔
عمران خان کے کھلاڑی سول سیکرٹریٹ، اور پنجاب اسمبلی سمیت اہم عمارات کے راستے سب سے پہلے بند کریں گے تاکہ سرکاری کام متاثر ہو جب کہ شہر کے داخلی راستوں کی بندش کے لیے بھی خصوصی پلان بنالیا گیا ہے۔
ذرائع کے مطابق پی ٹی آئی کے کارکن صبح کے وقت سیکرٹریٹ پہنچیں گے تاکہ سول سیکرٹریٹ سمیت سرکاری دفاتر شدید متاثر ہو۔ جس کے بعد پی ٹی آئی ورکرز کا اگلا پراو ہوگا جی پی او چوک، جہاں وہ جمع ہوں گے جس کے بعد تیسرے مرحلے میں صبح نو بجے کے بعد پی ٹی آئی کارکن چیئرنگ کراس پہنچ کر روڈ مکمل بلاک کر کے اہم عمارات کو جانیوالے راستے بند کردیں گے۔
ذرائع کا کہنا ہے کہ عمران خان کا سٹیج چیئرنگ کراس پر لگانے کا معاملہ زیرغور ہے جس کے بعد عمران خان کا شام پانچ بجے چیئرنگ کراس پر کارکنوں سے خطاب بھی متوقع ہے۔
ذرائع نے یہ بھی دعویٰ کیا ہے کہ پارٹی رہنماؤں کو حلقہ این اے 118 شاہدرہ اور این اے 125 بھٹہ چوک میں زیادہ لوگ لانے کی ہدایت کی گئی ہے۔
پی ٹی آئی داخلی راستے بند کرنے کے لیے شاہدرہ کو بلاک کرنے کی ہر ممکن کوشش بھی کرے گی۔
دوسری جانب شفقت محمود اور محمود الرشید لبرٹی گول چکر پر احتجاجی مظاہرے کی قیادت بھی کریں گے۔