اسلام آباد۔۔۔۔ قومی اسمبلی میں قائدِ حزبِ اختلاف سید خورشید شاہ کا کہنا ہے کہ عمران خان کی کال پر پاکستان بند نہیں ہوگا تاہم حکومت کو مذاکرات کرنے پڑیں گے۔اسلام آباد میں میڈیا سے بات کرتے ہوئے سید خورشید شاہ کا کہنا تھا کہ حکومت اور عمران خان دونوں ریاست کو نقصان پہنچانے پر تلے ہوئے ہیں، مسئلے کا سیاسی حل نکالا جانا چاہئے، تحریک انصاف سے مذاکرات نہ کرنے کا حکومتی بیان غلط ہے۔ عمران خان کی کال پر پاکستان بند نہیں ہوگا تاہم حکومت کو مذاکرات کرنے پڑیں گے۔ اگر حکومت عمران خان کے ساتھ مذاکرات نہیں کرے گی تو اپنے لئے گڑھا کھودے گی۔قائدِ حزبِ اختلاف کا کہنا تھا کہ چیف الیکشن کمشنر کے لئے جسٹس ریٹائرڈ طارق پرویز واحد امیدوار رہ گئے ہیں جن پر کسی نے اعتراض نہیں کیا لیکن تحریک انصاف تاحال جسٹس ریٹائرڈ ناصراسلم زاہد کے نام پر ڈٹی ہوئی ہے، امید ہے کہ آج چیف الیکشن کمشنر کے نام پر اتفاق ہوجائے گا۔