کراچی / پشاور۔۔۔۔کراچی کے مختلف علاقوں میں واقع مدارس سے بازیاب ہونے والی 36 میں سے 20 بچیاں آبائی علاقے باجوڑ پہنچ گئی ہیں قبل ازیں کراچی کے مختلف علاقوں کے مدارس سے بازیاب 36 میں سے 20 بچیوں کو پولیٹیکل ایجنٹ فاٹا کے سپرد کیا گیا جہاں سے انہیں خصوصی طیارے کے ذریعے پشاور منقتل کیا گیا اور پھر بچیوں کو ان کے آبائی علاقے باجوڑ کی جانب روانہ کر دیا گیا ۔ایڈیشنل سیکرٹری فاٹا اعظم خان کا کہنا تھا کہ بچیوں کو باجوڑ میں ان کے والدین کے سپرد کیا جائے گا تاہم کیس کے حوالے سے ان کے والدین سے پوچھ گچھ بھی کی جائے گی۔ بچیوں کے حوالے سے اصل تحقیقات کراچی پولیس نے کرنی ہے کیونکہ یہ واقعہ وہاں رونما ہوا۔واضح رہے کہ 4 روز قبل کراچی کے مختلف علاقوں میں واقع مدارس سے پولیس نے 36 بچیوں کو بازیاب کرایا تھا جن میں زیادہ تعداد باجوڑ کی بچیوں کی تھی۔ بازیاب کرائی گئی 15 بچیوں کو کراچی میں ہی ان کے والدین کے حوالے کر دیا گیا تھا جب کہ پنجاب سے تعلق رکھنے والی بچی کو بھی واقعے کے اگلے ہی روز اس کے والدین کے حوالے کر دیا گیا تھا۔