کراچی (این این آئی)یوٹیوبر و وی لاگر سعد الرحمن عرف ڈکی بھائی کی اہلیہ عروب جتوئی ڈیپ فیک ویڈیو کا نشانہ بن گئیں۔یوٹیوب پر یوٹیوبر ڈکی بھائی نے اہلیہ کے ہمراہ ایک ویڈیو پیغام جاری کیا ہے جس میں انہوں نے صارفین کو آگاہ کیا کہ انٹرنیٹ پر عروب جتوئی کی جعلی ویڈیو گردش کر رہی ہے۔
انہوں نے بتایا کہ ایک دوسری ویڈیو پر عروب جتوئی کا چہرہ نصب کیا گیا ہے جس سے انہیں کافی پریشانی کا سامنا ہے۔یوٹیوبر نے بتایا کہ گزشتہ کچھ عرصے سے انہیں اس حوالے سے دھمکیاں بھی موصول ہو رہی تھیں، لیکن انہوں نے کبھی ان دھمکیوں کو سنجیدگی سے نہیں لیا۔اس موقع پر عروب جتوئی نے بتایاکہ ڈیپ فیک ویڈیو کے وائرل ہونے سے مجھے ذہنی اذیت سے گزرنا پڑ رہا ہے ،نہیں چاہتی کوئی دوسرا بھی اسی اذیت سے گزرے، اس لئے جعلی ویڈیو بنانے والے کو کیفر انجام تک پہنچانا چاہتی ہوں۔
انہوں نے عوام سے بھی درخواست کی کہ جہاں بھی وائرل ویڈیو نظر آئے، وہاں کمنٹس میں بتائیں یہ جعلی ویڈیو ہے اور اس ویڈیو کو رپورٹ بھی کریں۔اس موقع پر ڈکی بھائی نے صارفین سے مدد طلب کی اور جعلی ویڈیو بنانے والے کی معلومات فراہم کرنے والے کو دس لاکھ روپے انعام دینے کا بھی اعلان کیا ۔انہوں نے کہا کہ قانون اپنے ہاتھ میں نہیں لیں گے بلکہ اس شخص کی شناخت کرکے اسے ایف آئی اے کے حوالے کریں گے ،اس معاملے کی تہہ تک ضرور پہنچیں گے۔
