اسلام آباد (این این آئی)پاکستان کے معروف گلوکار اور پی ٹی آئی رہنما ابرار الحق نے کہا ہے کہ رات گئے ان کے گھر پولیس نے چھاپہ مارا جس میں ان کے گھر والوں کو ہراساں کیا گیا۔ٹوئٹر پر جاری ویڈیو بیان میں ابرار الحق نے اپنے گھر پر پولیس کے چھاپے کی شدید مذمت کی، انہوں نے بتایا کہ رات گئے پولیس نے میرے گھر پر چھاپہ مارا جس دوران ان کے گھریلو ملازمین پر تشدد کیا گیا جو کہ معصوم لوگ تھے، ساتھ ہی میرےگھر والوں کو پولیس کی جانب سے ہراساں کیا گیا۔
گلوکار نے کہا کہ پولیس والے بغیر اجازت گھر میں داخل ہوئے اور تلاشی شروع کردی، اس دوران بچوں کو ان کے نانا کے گھر بھیجنے سے بھی روک دیا گیا اور دھمکی دی گئی کہ وہ میرے بیٹے کو اْٹھا کر لے جائیں گے پھر اس کا باپ آئیگا۔ابرار الحق نے ویڈیو بیان میں سوال کیا کہ بچوں کے باپ نے آخر کیا کیا ہے؟ میں نے سیاسی زندگی میں ہمیشہ کوشش کی کہ پیار سے گزاروں، میں تو 9 مئی کے واقعات پر بھی مذمت کرتا رہا ہوں جس کے ثبوت میڈیا پر موجود ہیں، میں نے ویڈیو پیغام بھی جاری کیا اور لوگوں کو درس دیتا رہا کہ وہ توڑ پھوڑ، جلاؤ گھیراؤ نہ کریں۔گلوکار نے ویڈیو میں کہا کہ میری سمجھ سے باہر ہے کہ یہ لوگ مجھے کیوں اٹھانا چاہتے ہیں؟۔انہوں نے کہا کہ میں پاک فوج سے بے حد محبت کرتا ہوں، میرے خاندان کا فوج سے تعلق رہا ہے اور میں خود بھی فوج میں جانا چاہتا تھا۔
