کراچی (نیوز ڈیسک)عالمی مارکیٹ میں سونے کے نرخوں میں نمایاں کمی کے اثرات پاکستانی صرافہ بازار پر بھی پڑے ہیں، جہاں فی تولہ سونا مزید 12 ہزار 800 روپے سستا ہوگیا۔
آل پاکستان صرافہ جیمز اینڈ جیولرز ایسوسی ایشن کے مطابق 12 ہزار 800 روپے کی کمی کے بعد ملک میں ایک تولہ سونے کی قیمت 4 لاکھ 38 ہزار 136 روپے پر آگئی ہے۔
اسی طرح 10 گرام سونے کے نرخ میں بھی 10 ہزار 973 روپے کی کمی ریکارڈ کی گئی، جس کے بعد اس کی قیمت 3 لاکھ 75 ہزار 631 روپے ہوگئی۔
دوسری جانب بین الاقوامی بلین مارکیٹ میں بھی سونے کی قیمت میں نمایاں کمی دیکھی گئی۔ عالمی سطح پر سونا 128 ڈالر کی کمی کے بعد 4 ہزار 156 ڈالر فی اونس کی سطح پر آگیا ہے۔
مارکیٹ میں سونے کی قیمتوں میں حالیہ کمی کی ایک بڑی وجہ امریکی شرح سود میں اضافے کی توقعات کو قرار دیا جا رہا ہے۔
