کراچی (این این آئی) جنرل سیلز ٹیکس کی شرح 25 فیصد سے کم کرکے 18 فیصد کیے جانے کے بعد گاڑیوں کے اسمبلرز نے ہائبرڈ گاڑیوں کی قیمتوں میں لاکھوں روپے کمی کردی۔

ہونڈا اٹلس کارز نے ایچ آر وی ای: ایچ ای وی کی قیمت ایک کروڑ 3 لاکھ 69 ہزار روپے سے کم کرکے 92 لاکھ 99 ہزار روپے کردی، جبکہ ایچ آر وی وی ٹی آئی ایس کی قیمت 77 لاکھ 99 ہزار روپے سے کم کرکے 72 لاکھ 99 ہزار روپے مقرر کی گئی ہے۔ہونڈا کے مطابق نئی قیمتیں محدود مدت اور محدود اسٹاک کیلئے ہوں گی، جبکہ 25 ستمبر یا اس کے بعد انوائس ہونے والے تمام آرڈرز پر نئی قیمتوں کا اطلاق ہوگا۔انڈس موٹر کمپنی نے ٹویوٹا کرولا کراس ایچ ای وی ایکس کی قیمت میں 5 لاکھ 70 ہزار روپے کمی کرکے نئی قیمت 97 لاکھ 29 ہزار روپے مقرر کردی۔

کرولا کراس ایچ ای وی کی قیمت بھی 5 لاکھ 50 ہزار روپے کم کرکے 92 لاکھ 99 ہزار روپے کردی گئی ہے۔چیری ماسٹر کے ڈائریکٹر سیلز اینڈ مارکیٹنگ سید آصف احمد کے مطابق گاڑیوں پر جی ایس ٹی 25 فیصد سے کم کرکے 18 فیصد کرنے کے فیصلے سے فروخت میں بہتری آنے کی توقع ہے۔انہوں نے کہا کہ 25 فیصد جی ایس ٹی کے باعث گاڑیوں کی طلب میں نمایاں کمی ہوئی تھی اور صارفین نے حکومتی فیصلے کے انتظار میں خریداری مؤخر کردی تھی۔