اسلام آباد (نیوز ڈیسک ) پنجاب سمیت ملک بھر میں ڈرائیونگ لائسنس حاصل کرنے کے لیے نیا طریقہ کار اور فیس شیڈول جاری کر دیا گیا ہے۔ شہری اب اپنی ضرورت کے مطابق ایک سال سے لے کر پانچ سال تک کی مدت کا لائسنس بنوا سکیں گے۔

تفصیلات کے مطابق، ٹریفک قوانین پر عمل درآمد کو یقینی بنانے اور سڑکوں پر نظم و ضبط قائم رکھنے کے لیے درست ڈرائیونگ لائسنس رکھنا لازمی قرار دیا گیا ہے۔ بغیر لائسنس گاڑی چلانے والے ڈرائیوروں کو بھاری جرمانے اور قانونی کارروائی کا سامنا کرنا پڑ سکتا ہے۔

ٹریفک پولیس حکام کا کہنا ہے کہ ڈرائیونگ لائسنس اس بات کی تصدیق کرتا ہے کہ ڈرائیور نے لازمی ٹیسٹ پاس کیے ہیں اور ٹریفک قوانین سے مکمل طور پر آگاہ ہے۔ یہ لائسنس نہ صرف قانونی اجازت نامہ ہے بلکہ حادثات میں کمی کا ضامن بھی بنتا ہے۔

لائسنس کے حصول کا طریقہ کار
باقاعدہ ڈرائیونگ لائسنس حاصل کرنے سے قبل امیدواروں کے لیے لرنر لائسنس لینا ضروری ہے، جس کی فیس 500 روپے مقرر ہے اور یہ آن لائن بھی بنوایا جا سکتا ہے۔ اس کے بعد امیدوار کو مقررہ سینٹر میں جا کر تھیوری اور عملی امتحان دینا ہوگا، کامیابی کی صورت میں باقاعدہ لائسنس جاری کر دیا جاتا ہے۔

فیس شیڈول
پنجاب میں کار ڈرائیونگ لائسنس کے لیے ٹیسٹ فیس 150 روپے رکھی گئی ہے۔ امتحان پاس کرنے کے بعد مزید 1,350 روپے جمع کرانے ہوں گے جبکہ کوریئر چارجز 480 روپے ہیں، یوں ایک سال کے ڈرائیونگ لائسنس کی کل لاگت تقریباً 1,830 روپے بنتی ہے۔ پانچ سال تک کے لائسنس کی فیس مدت کے حساب سے مختلف ہوگی۔