کراچی(این این آئی)ملک میں اقتصادی ترقی کی رفتار تو کم ہو گئی لیکن مہنگائی بڑھنے کی رفتار نے تیز رفتاری کے تمام ریکارڈ توڑ دئیے،آٹھ ماہ کے دوران ہفتہ واربنیادوں پر مہنگائی کی شرح 6سال کی بلند ترین سطح پر پہنچ گئی۔پاکستان ادارہ شماریات کے مطابق اپریل کے پہلے ہفتے کے دوران ہفتہ واربنیادوں پر مہنگائی میں اضافے کی اوسط شرح 12.09 فیصد رہی، مہنگائی سے سب سے زیادہ متاثر مڈل کلاس ہو رہی ہے جس کے لیے مہنگائی کی اوسط شرح 16.5فیصد تک پہنچ گئی ہے۔ رپورٹ کے

مطابق ہفتے کے دوران ٹماٹر، پیاز ، چینی، گھی، چاول، چکن، گوشت، دودھ، دیہی، چائے اور دالوں سمیت 27 اشیا کی قیمت میں 17 فیصد تک اضافہ ریکارڈ کیا گیا جبکہ پیٹرول، ڈیزل، مٹی کا تیل، ایل پی جی اور کپڑا بھی مہنگا ہو گیا۔رپورٹ کے مطابق اپریل کے پہلے ہفتے کے دوران مارکیٹ میں کھانے پینے اور روز مرہ استعمال کی 53 بنیادی اشیا میں سے 49 اشیا گزشتہ سال اپریل کے مقابلے میں 89 فیصد تک مہنگی ہو چکی ہیں جبکہ صرف دو اشیا کی قیمت میں معمولی کمی ریکارڈ کی گئی۔

موضوعات:مہنگائی