اسلام آباد (مانیٹرنگ ڈیسک)جے آئی ٹی رپورٹ کے پاکستان اسٹاک مارکیٹ پرمنفی اثرات دیکھے گئے جس کے باعث مارکیٹ میں شدید مندی دیکھی گئی ہے۔ گزشتہ روز پاناما کیس کی کارروائی میں تاخیر کی اطلاعات پر پاکستان اسٹاک ایکسچینج (پی ایس ایکس) میں بڑے پیمانے پرسرمایہ کاری ہوئی تھی اور نئے کاروباری ہفتے کے پہلے روز تیزی کی بڑی لہرکے بعد 100 انڈیکس میں 1052پوائنٹس کا اضافہ ہوا تھا۔

تاہم آج پاکستان اسٹاک ایکس چینج میں شدید مندی دیکھی جارہی ہے اور ہنڈریڈ انڈکس میں کاروبار کے آغاز پر ٹریڈنگ کے دوران 1600 سے زیادہ پوائنٹس کی کمی دیکھی گئی۔پاکستان اسٹاک ایکس چینج کا 100 انڈیکس 45 ہزار کی سطح سے بھی نیچے آگیا۔12 جون کو بھی وزیراعظم نوازشریف کی جے آئی ٹی کے سامنے پیشی کے روز بھی ہنڈرڈ انڈیکس 1855 پوائنٹس کی کمی کے ساتھ بند ہوا تھا۔واضح رہے کہ مشترکہ تحقیقاتی ٹیم نے پاناما کیس پر سپریم کورٹ میں اپنی رپورٹ جمع کرادی ہے جس کے بعد عدالت عظمیٰ نے کیس کی اگلی سماعت پیر 17 جولائی تک ملتوی کردی۔