کراچی (آن لائن)بینک دولت پاکستان نے عوام الناس کو مطلع کیا ہے کہ جعلی ای میل پتہ گورنر اسٹیٹ بینک آف پاکستان کے نام سے بنایا گیا ہے اور اس پتے سے ایک جعلی ای میل گردش کر رہی ہے جس میں بتایا جاتا ہے کہ ای میل کے وصول کنندہ کو کسی غیر ملکی حکومت سے بھاری مالیت کی رقم موصول ہوئی ہے۔ جن لوگوں کو یہ ای میل ملی ان میں سے بعض یہ معاملہ اسٹیٹ بینک کے علم میں لائے ہیں،
اسٹیٹ بینک کے مطابق جعلی ای میل کی تفصیلات ذیل کی تصویر میں دیکھی جا سکتی ہیں۔اسٹیٹ بینک نے عوام کے مفاد میں وضاحت کی ہے کہ گورنر اسٹیٹ بینک ان کے دفتر یا اسٹیٹ بینک آف پاکستان نے ایسی کوئی ای میل جاری نہیں کی ہے، اور یہ عوام کو دھوکہ دینے اور ادارے کو بدنام کرنے کی ایک کوشش ہے۔ اسٹیٹ بینک نے قانونی چارہ جوئی کے لئے ایک درخواست کراچی میں ایف آئی اے حکام کو دے دی ہے۔
