اسلام آباد/لاہور( این این آئی)پاکستان انٹر نیشنل ائیر لائنز (پی آئی اے )دو سال کے وقفے کے بعد سپین کے شہر بارسلونا کیلئے ہفتہ وار دو پروازوں کا آغاز کر دیا جو کہ لاہور اور اسلام آباد سے چلائی جائیں گی۔گزشتہ روز پہلی پرواز پی کے 769اسلام آباد سے براستہ پیرس، بارسلونا کیلئے روانہ ہوئی۔7 دسمبر کو پی آئی اے کی چترال سے اسلام آباد آنے والی پرواز کو پیش آنے والے حادثے کے سبب بارسلونا کے لیے پروازوں کے آغاز کی تقریب منسوخ کر دی گئی تھی۔

پی آئی اے کے چیف ایگزیکٹو آفیسر برنڈ ہلڈن برانڈ نے بارسلونا کے لیے مسافروں کو رخصت کیا ۔ انہوں نے بتایا کہ تقریباً2 سال کے وقفہ کے بعد بارسلونا کیلئے شروع کی جانے والی پروازوں سے مسافروں کو پاکستان اور بارسلونا کے درمیان آسان سفری سہولتوں کا دوبارہ سے آغاز ہو گیا ہے۔ترجمان پی آئی اے کے مطابق قومی ائیرلائن بارسلونا کیلئے ہفتہ وار دو پروازیں چلائے گی جن میں سے ایک ہر اتوار کو اسلام آباد جبکہ دوسری ہر منگل کو لاہور سے بارسلونا روانہ ہوگی۔