فیصل آباد(نیوز ڈیسک) گندم کی خریداری مہم کے سلسلہ میں باردانہ کی تقسیم اور کاشتکاروں کی سہولت کیلئے محکمہ مال کے ریونیو سٹاف کو خریداری مراکز پروسط اپریل سے حاضری یقینی بنانے کی ہدایت کی گئی ہے اور کہاگیاہے کہ نہ صرف کاشتکاروں کو باردانہ کی فراہمی کے شیڈول سے مکمل طور پر آگاہ رکھا جائے بلکہ ہر سنٹرپر کاشتکاروں کی معلومات کیلئے آگاہی بینرز بھی آویزاں کئے جائیں ۔سٹی ڈسٹرکٹ گورنمنٹ فیصل آباد کے ترجما ن نے بتایاکہ ڈی سی او فیصل آباد نور الامین مینگل نے متعلقہ حکام کو سختی سے ہدایت کی ہے کہ گرداوریوں کی لسٹ بھی فوری طور پر فراہم کی جائے تاکہ متعلقہ افسران کو ڈیوٹیاں تفویض کی جاسکیں۔ انہوںنے بتایاکہ محکمہ خوراک کے افسران کو ہدایت کی گئی ہے کہ وہ 25اپریل سے شروع ہونے والی گندم کی خریداری مہم کی روزانہ کی بنیاد پر رپورٹ ڈی سی او کو فراہم کریں جبکہ اسسٹنٹ کمشنرز کو بھی ڈیلی بیسز پر مانیٹرنگ کاحکم دیاگیاہے۔ انہوںنے بتایاکہ ڈی سی او خود بھی اچانک خریداری مراکز کے دورے کریں گے تاکہ گندم کی شفاف خریداری کو یقینی بنایاجاسکے۔انہوںنے بتایاکہ ضلع فیصل آباد میں ایک لاکھ48ہزار میٹرک ٹن گندم کی خرید کیلئے 11خریداری مراکز قائم کردیئے گئے ہیں جہاں سے کاشتکاروں کو باردانہ کی فراہمی 20اپریل سے شروع کردی جائے گی۔