راولپنڈی (نیوز ڈیسک)محکمہ زراعت پنجاب نے کپاس کے کاشتکاروں کو فصل کو وائرس سے بچانے کے لیے میزبان فصلوں سے سفید مکھی کا تدارک کرنے اور کاشت سے قبل کھیتوں سے جڑی بوٹیوں کی تلفی یقینی بنانے کی ہدایت کی ہے ۔ ترجمان کے مطابق کپاس کی فصل کو وائرس کی وجہ سے ناقابل تلافی نقصان کا احتمال ہوتا ہے اور سفید مکھی کاٹن لیف کرل وائرس کو پھیلانے کا سبب بنتی ہے ۔زرعی ماہرین کے مطابق سفید مکھی کے موثر تدارک کے لیے متبادل فصلوں اور میزبان پودوں بالخصوص جڑی بوٹیوں کی موثر تلفی ضروری ہے ۔اس مقصد کے لیے بہاریہ فصلات خاص طور پر سبزیوں کی باقیات فوراََ تلف کریں۔ ترجمان نے کہا کہ زرعی ماہرین کی سفارش کے مطابق سفید مکھی کے کنٹرول کے لیے ایک ہی قسم کی زہر بار بار استعمال نہ کریںبلکہ مقامی زرعی ماہرین کے مشورہ سے بدل کر سفارش کردہ زہر کا سپرے کریں۔