لاہور(آئی این پی)ملک بھر میں شبِ برات انتہائی عقیدت و احترام کے ساتھ منائی گئی ،مساجد اور گھروں میں ذکر واذکار کی محفلوں کا خصوصی اہتمام کیا گیا جس میں للہ تعالی کے حضور گناہوں سے توبہ، بخشش و مغفرت، ایمان و سلامتی، رزق کی کشادگی، آفات، مصیبت، محتاجی، تنگ دستی، صحت و عافیت ،عالم اسلام پاکستان کی سلامتی کیلئے خصوصی دعائیں کی گئیں۔

لوگوں نے اپنے پیاروں کی قبروں پر فاتحہ خوانی کے لیے قبرستانوں کا رخ بھی کیا۔تفصیلات کے مطابق ملک بھر میں شبِ برات انتہائی عقیدت و احترام کے ساتھ منائی گئی۔مساجد اور گھروں میں ذکر واذکار کی محفلوں کا خصوصی اہتمام کیا گیا۔یوں توشعبان المعظم کا سارا مہینہ برکت والا ہے لیکن شعبان المعظم کی 15 ویں رات کو شب برات کہا جاتا ہے، شب کے معنی رات اور برات کے معنی چھٹکارے کے ہیں، روایات میں ہے کہ اس رات اللہ رب العزت کی اپنی مخلوق پرخصوصی رحمتیں نازل ہوتی ہیں۔عرب قبائل میں سے سب سے زیادہ بکریاں پالنے والا قبیلہ بنو کلب تھا، اس رات میں اللہ رب العزت قبیلہ بنو کلب کی بکریوں کے بالوں کی تعداد سے زیادہ گناہ گاروں کی بخشش فرماتا ہے۔کہا جاتا ہے کہ اس رات سال بھر میں ہونے والے تمام امور کائنات، عروج و زوال ، کامیابی و ناکامی، رزق میں وسعت و تنگی موت و حیات اور کارخانہ قدرت کے دوسرے شعبہ جات کی فہرست مرتب کی جاتی ہے اور فرشتوں کواپنے اپنے کاموں کی تقسیم کردی جاتی ہے۔اسی مناسبت سے عبادات اور مناجات کا سلسلہ رات بھر جاری رہا جس میں للہ تعالی کے حضور گناہوں سے توبہ، بخشش و مغفرت، ایمان و سلامتی، رزق کی کشادگی، آفات، مصیبت، محتاجی، تنگ دستی، صحت و عافیت ،عالم اسلام پاکستان کی سلامتی کیلئے خصوصی دعائیں کی گئیں۔اس کے علاوہ لوگوں نے اپنے پیاروں کی قبروں پر فاتحہ خوانی کے لیے قبرستانوں کا رخ بھی کیا۔