لاہور(این این آئی)وزیراعلی پنجاب چودھری پرویزالٰہی کی زیر صدارت رات گئے گندم و آٹے کے بحران کے خاتمے کیلئے ہنگامی اجلاس میں بڑے فیصلے کئے گئے۔ سیکرٹری خوراک نادر چٹھہ اور ہمیش خان نے اجلاس میں شرکت کی۔وزیراعلی چودھری پرویزالٰہی نے اعلی حکام کو ہدایت کی کہ 24 گھنٹے کے اندر اندر لائحہ عمل طے کیا جائے۔انہوں نے کہا کہ فلور ملوں کیلئے گندم کا یومیہ سرکاری کوٹہ بڑھا کر دو گناکر دیا گیا ہے،صوبے بھر میں سیل پوائنٹس کو بھی دوگنا کر دیا گیا ہے۔ انہوں نے کہا کہ پنجاب بھر میں روزانہ 10 کلو آٹے کے 18 لاکھ 40 ہزار تھیلے سرکاری ریٹ پر دستیاب ہوں گے۔ سوموار سے فلور ملوں کو ان کے اپنے مطالبے سے زیادہ 26 ہزار ٹن سرکاری گندم جاری کر دی جائے گی۔سرکاری کوٹہ بڑھنے سے نجی گندم اور آٹے کی قیمتوں میں نمایاں کمی آئے گی۔

موضوعات:چودھری پرویزالٰہی