اسلام آباد(آئی این پی)داسو پن بجلی منصوبے کی تعمیر میں حائل ایک اور رکاوٹ دور کرلی گئی ہے۔ترجمان واپڈا کے مطابق داسو ہائیڈرو پاور پراجیکٹ کے معاملے پر واپڈا، سول انتظامیہ اور کوہستان کے تینوں اضلاع کے عمائدین پر مشتمل متحدہ کوہستان جرگہ کے درمیان معاہدے پر دستخط ہوگئے۔ترجمان کے مطابق معاہدے کے تحت واپڈا اپر کوہستان، لوئر کوہستان اور کوہستان میں مزید ترقیاتی اسکیمیں عمل میں لائے گا۔واپڈا ترجمان کے مطابق مقامی عمائدین یقینی بنائیں گے کہ ترسیلی لائن کی تعمیر میں رکاوٹ نہ آئے، واپڈا کوہستان کے تینوں اضلاع میں چھوٹے پن بجلی منصوبے، اسکول اور ووکیشنل ٹریننگ سینٹر تعمیر کرے گا۔ترجمان کے مطابق درجہ چہارم کی ملازمتوں پرمقامی افراد بھرتی ہوں گے، دیگر ملازمتوں میں بھی مقامی افراد کوترجیح دی جائے گی۔واپڈا ترجمان نے مزید کہا کہ داسو ہائیڈرو پاور پراجیکٹ اپر کوہستان میں دریائے سندھ پر تعمیر کیا جارہا ہے۔