اسلام آباد(نیوزڈیسک)حکومت نے تھری جی اور فورجی سپیکٹرم کی نیلامی کادوسرا مرحلہ جلد منعقد کرنے کافیصلہ کیا ہے اور اس مقصد کیلئے ترکی سمیت دیگرملکوں کی موبائل فون کمپنیوں سے رابطے شروع کردیئے گئے ہیں اس ضمن میں پاکستان میں ترکی کے سفیر بابر گرگھن نے جمعرات کو یہاں وزیرمملکت برائے انفارمیشن ٹیکنالوجی وٹیلی کام انوشہ رحمان سے ملاقات کی اور ان سے باہمی دلچسپی کے امورپرتبادلہ خیال کیا ملاقات میں سیکرٹری آئی ٹی عظمت علی رانجھا بھی موجود تھے وزیرمملکت نے کہاکہ موجودہ حکومت ترکی کے ساتھ اپنے تعلقات کو بڑی اہمیت دیتی ہے اور چاہتی ہے کہ آئی ٹی وٹیلی کام سمیت دیگرشعبوں میں تعاون بڑھایاجائے۔ وزیرمملکت نے بتایا کہ تھری اور فور جی کی کامیاب نیلامی کے بعد صارفین کی تعداد میں اضافہ ہوا ہے اور حکومت جلد نیلامی کادوسرا مرحلہ منعقد کرے گی اس مقصد کیلئے ترکی سمیت دیگر ممالک کی کمپنیاں بھی نیلامی میں حصہ لے سکتی ہیں کیونکہ 850میگاہرٹز سپیکٹرم نئی کمپنیوں کیلئے رکھا گیا ہے اور یہ نئی کمپنیوں کیلئے پاکستان میں اپنا کاروبار شروع کرنے کاسنہرا موقع ہے ۔ترک سفیر نے حکومت پاکستان کے اقدامات کو سراہتے ہوئے مختلف شعبوں میں تعاون بڑھانے میں گہری دلچسپی کااظہار کیا۔