اسلام آباد (این این آئی)پاکستان تحریک انصاف کے رہنما فواد چوہدری اور زلفی بخاری کے دعوؤں پر دبئی کے ڈیلر نے کہا ہے کہ ہم نے کسی سے گھڑی خریدی نہ کسی کو بیچی، تصویر پروموشن کیلئے لگائی تھی، سیاسی پروپیگنڈے کیلئے ہمارا نام استعمال نہ کیا جائے،
ورنہ قانون اپنا راستہ لے گا۔ نجی ٹی وی کے مطابق سابق وزیر فواد چوہدری اور زلفی بخاری نے سولہ نومبر کو دعویٰ کیا کہ سعودی عرب سے ملی گھڑی پہلے پاکستانی ڈیلر کو بیچی گئی، پھر اس ڈیلر نے دبئی میں گھڑی فروخت کردی۔ذلفی بخاری نے گھڑی کی قیمت بھی بتائی، ڈھائی لاکھ ڈالر میں دبئی میں بیچنے کا دعویٰ کیا تاہم دبئی کے ڈیلر نے دونوں کا بھانڈا پھوڑ دیا۔ڈیلر نے کہا کہ نہ ہم نے کسی سے گھڑی خریدی، نہ کسی کو بیچی، گھڑی کی تصویر پروموشن کے لیے لگائی تھی۔ڈیلر نے خبردار کرتے ہوئے کہاکہ سیاسی پروپیگنڈے کیلئے ہمارا نام استعمال نہ کیا جائے، ورنہ قانون اپنا راستہ لے گا۔دوسری جانب پاکستان تحریک انصاف کے رہنما سابق وزیر فواد چوہدری نے گھڑی خریدنے والے بزنس مین عمر فاروق کو سنگین نتائج کی دھمکیاں دی ہیں۔نجی ٹی وی کے مطابق توشہ خانہ اورقیمتی گھڑی کے بارے حقائق بتانے پر پی ٹی آئی دھمکیوں پر اتر آئی ہے۔ تحریک انصاف کے رہنما فواد چوہدری نے گھڑی خریدنے والے بزنس مین عمر فاروق کو سنگین نتائج کی دھمکیاں دی ہیں اور بیان واپس لینے کیلئے سخت دباؤ ڈالا ہے۔ذرائع کے مطابق پی ٹی آئی رہنما فواد چوہدری نے بزنس مین عمر فاروق کو فون کرکے بیان واپس لینے کیلئے دباؤ ڈالا اور سخت لہجے میں کہا کہ اپنا بیان واپس لیں، اور اپنے نئے بیان میں بتائیں کہ پہلی باتیں غلطی سے کہہ دیں۔فواد چوہدری نے عمر فاروق سے کہا کہ اس کیس میں فرح خان (گوگی) اور شہزاد اکبر کا ذکر نہ کریں۔ فواد چوہدری نے بات نہ ماننے پر عمر فاروق کو سنگین نتائج کی دھمکیاں بھی دیں۔نجی ٹی وی کے مطابق جب عمر فاروق سے رابطہ کیا گیاتو انہوں نے بھی تصدیق کی کہ انہیں نامعلوم نمبروں سے دھمکیاں مل رہی ہیں، جب کہ فواد چوہدری نے بھی فون کرکے بیان واپس لینے کی دھمکی دی ہے۔
