اسلام آباد ( آن لائن، این این آئی)قومی سلامتی کمیٹی کا بدھ کو ہونے والا اہم اجلاس موخر کر دیا گیا ،ذرائع نے بتایا کہ قومی سلامتی کمیٹی کا اجلاس وزیر اعظم شہباز شریف کی مصروفیات کے باعث موخر کیا گیا ہے ،ذرائع نے بتایا آج بدھ کو وزیر اعظم ہاؤس میں قومی سلامتی
کمیٹی کا اجلاس ہونا تھا جس میں اعلی عسکری قیادت نے شرکت کرنا تھی ،اجلاس میںوزیر اعظم ہاؤس آڈیو لیکس اور سیکیورٹی معاملات پر مشاورت ہونی تھی،اب یہ اجلاس اجلاس وفاقی کابینہ اور وزیر اعظم شہباز شریف کی مصروفیات کے باعث مؤخر کیا گیا ہے۔دوسری جانب وزیراعظم شہباز شریف کی زیرصدارت وفاقی کابینہ کا اجلاس کل صبح پی ایم ہائوس میں ہو گا،وزیراعظم اقوام متحدہ کی جنرل اسمبلی کے اجلاس میںشرکت کیلئے دورہ امریکا پر کابینہ ارکان کو اعتماد میں لیں گے،نئے وزیر خزانہ اسحاق ڈار کو بھی خوش آمدید کہاجائے گا ، سیاسی صورتحال پر مشاورت اور معاشی صورتحال پر کابینہ کو بریفنگ دی جائے گی۔ ذرائع کے مطابق آڈیو لیکس اور عمران خان کی کالز سمیت دیگر سیاسی معاملات پر ارکان اپنی رائے دیں گے۔کابینہ کے پانچ رکنی ایجنڈے کے مطابق 7ستمبر کو کابینہ کمیٹی برائے نجکاری اور کابینہ کی کمیٹی بر ائے قانون سازی کے 15ستمبر کے اجلاس کے فیصلوں کی توثیق کی جا ئے گی۔ کابینہ 21 ستمبر کو اقتصادی رابطہ کمیٹی کے فیصلوں کا بھی جائزہ لے گی ۔ وزارت موسمیاتی تبدیلی کے منصوبے لیونگ انڈس انیشیٹیو، بورڈ آف انویسٹمنٹ کی معاہدوں سے متعلق اسٹریٹجی کی سمری بھی منظوری کیلئے کابینہ اجلاس میں پیش کی جائے گی۔
