بھارتی خفیہ ایجنسی ’’را‘‘ نے پاکستان کو بدنام کرنے کے لیے مذموم منصوبہ تیار کر لیا۔ بھارت میں حساس مقامات پر حملوں کا ڈرامہ رچا کر الزام پاکستان پر عائد کیا جائے گا۔ پاکستان اور افغانستان کے بڑھتے ہوئے اچھے تعلقات بھارت کو کھٹکنا شروع ہو گئے ہیں۔ افغانستان سے اتحادی افواج کے انخلا کے بعد بھارت خطے میں اہم کردار کیلئے کسی بھی سازش سے گریز نہیں کر رہا۔ اس نے پاک افغان تعلقات میں دراڑ ڈالنے کیلئے نئی سازش کے تانے بانے بننا شروع کر دیے ہیں۔ بھارتی خفیہ ایجنسی ’’را‘‘ نے ایک مذموم منصوبہ تیار کیا ہے جس کے تحت بھارت میں کچھ حساس مقامات پر بڑے پیمانے پر حملوں کا ڈرامہ رچایا جائے گا اور اس کا الزام پاکستان اور آئی ایس آئی پر عائد کیا جائے گا۔ بھارتی خفیہ ایجنسی نے ان حملوں کے لیے بڑی تعداد میں تربیت یافتہ دہشت گردوں کی خدمات حاصل کر لی ہیں۔ کچھ بدنام میڈیا چینلز کو بھی پاکستان کے خلاف پروپیگنڈے کے لیے استعمال کیا جائے گا۔ بھارت اپنے اس مذموم منصوبے پر کسی بھی وقت عملدرآمد کر سکتا ہے۔