اسلام آباد (مانیٹرنگ ڈیسک) معروف صحافی کامران خان نے دعویٰ کیا ہے کہ کل پرسوں سیاسی گھن گرج گولہ باری کے دوران بہتر خبر آئے گی،ان کا کہنا تھا کہ گو کہ تلواریں میان سے نکل چکی ہیں، فریقین لاکھوں حامیوں کو سڑکوں پر لا چکے ہیں اور جنگ کے بادل منڈلا رہے ہیں

لیکن میں اب بھی مطمئن ہوں، مجھے یقین ہے کہ اللہ تعالیٰ کے رحم وکرم کے ساتھ ملک ایک بھیانک ٹکراؤ سے بچ جائے گا۔ان کا کہنا تھا کہ سیاسی بحران کی تاریک سرنگ کے آخر میں روشنی کی کرن پھوٹ چکی ہے۔ اگلے 48 گھنٹے بہت ہی اہم ہیں۔ان کا کہنا تھا کہ ملک کو اس بحرانی کیفیت سے نکالنے کی کاوش کے محور آرمی چیف جنرل قمر جاوید باجوہ ہیں، اللہ تعالیٰ کا شکر ہے کہ بہتر پیشرفت ہے۔کامران خان نے امید ظاہر کرتے ہوئے کہا کہ کل اور پرسوں کی گولہ باری کے دوران ہی بڑی اچھی خبر آئے گی۔کامران خان کا کہنا تھا کہ عمران خان اپنی فتح اور اپوزیشن اپنی کامیابی کے اعلانات کریں گے۔ اللہ تعالیٰ نے چاہا تو ہم پاکستانیوں کی اس عذاب سے جان چھوٹ جائے گی۔ معاہدے کی بنیاد قبل از وقت اسی سال ہی انتخابات ہوں گے۔ ان کا کہنا تھا کہ تحریک عدم اعتماد واپس لی جائے گی، قبل از وقت انتخابات اپوزیشن کے بنیادی مطالبے کی تکمیل ہے۔عمران خان خود انتخابات کال کریں گے، وہ اپوزیشن کو میدان میں مقابلے کی دعوت دیں گے، معروف صحافی کا کہنا تھا کہ ابھی اس معاہدے کی نوک پلک درست کی جا رہی ہے۔