اسلام آباد،دبئی (آن لائن) انٹرنیشنل کرکٹ کونسل مینز ٹی ٹوئنٹی ورلڈکپ میں قومی ٹیم کے کپتان بابر اعظم نے بھارت کے خلاف ٹیم کا اعلان کردیا۔کھلاڑیوں میں کپتان بابر اعظم، محمد رضوان، فخر زمان، شعیب ملک، محمد حفیظ، حارث رؤف، شاہین شاہ، حسن علی، آصف علی،
عماد وسیم، شاداب خان اور حیدر علی شامل ہیں۔انٹرنیشنل کرکٹ کونسل مینز ٹی ٹوئنٹی ورلڈکپ 2021 کا سپر 12 مرحلہ شروع ہوگیاہے ، جس میں دو میچز کھیلے جا چکے۔دوسری جانب پاکستانی ٹیم کے کپتان بابراعظم نے اپنی عمدہ کارکردگی کا راز بتادیا۔پی سی بی کی طرف سے جاری کردہ ویڈیو میں بابر اعظم نے اپنی نیٹ پریکٹس کی تیاری کا احوال بیان کرتے ہوئے کہا کہ نیٹ پر جاکر کیا کچھ کرنا ہے، اس کی رات کو ہی پلاننگ کرلیتا ہوں، جتنی اچھی پریکٹس ہوگی، اتنا ہی کھیل میں نکھار آئے گا۔ انہوں نے کہا ہوٹل سے گراؤنڈ آتے ہوئے اپنی ٹریننگ پر زیادہ فوکس کرتاہوں، نیٹ میں ساری توجہ اپنی خامیوں پر قابو پانے پر ہوتی ہے، اس کے ساتھ وہ شاٹس جو میرے فیورٹ ہیں، ان کی ٹریننگ کرتا ہوں تاکہ خوبیوں کو مزید بہتر کیا جائے، اس طرح ہر سیریز کی پلاننگ کرتا ہوں کہ اس میں کیا ہدف حاصل کرنا ہے۔ انہوں نے کہا ورلڈکپ ایک بڑا ایونٹ ہے اس میں ہر ٹیم بھرپور تیاری کے ساتھ میدان میں اترتی ہے، ہماری تیاری بھی اچھی ہے اور کوشش کریں گے کہ بہترین نتائج دیں۔
