برلن(این این آئی)جرمن وزیر خارجہ ہائیکو ماس نے افغان دارالحکومت کابل میں جرمن سفارت خانہ دوبارہ کھولنے کی تیاری کا عندیہ دیا ہے۔ میڈیارپورٹس کے مطابق دوحہ میں ہائیکو ماس نے کہا کہ اگر سیاسی طور پر ممکن ہو سکا اور سکیورٹی صورت حال نے اجازت دی، تو کابل میں جرمن سفارت خانہ دوبارہ کھلنا چاہیے۔ ان کا کہنا تھا کہ افغانستان میں سفارتی موجودگی بہت ضروری ہے۔ جرمنی کی جانب سے طالبان کے ساتھ عملی امور پر مذاکرات کیے جا رہے ہیں۔برلن حکومت طالبان سے خاص طور پر انسانی حقوق کی پاسداری اور سکیورٹی کی ضمانتوں کا مطالبہ کر رہی ہے۔ ساتھ ہی یہ بھی کہا جا رہا ہے کہ اگر طالبان کو مدد درکار ہے، تو ان کو عالمی برادری کے شرائط پر عمل کرنا ہو گا۔