لاہور( این این آئی)پاکستان ریلوے نے این سی او سی کی ہدایات کی روشنی میں کرونا ویکسین لگوانے سے متعلق عوام کی آگاہی کے لئے ریلوے اسٹیشنوں کی

حدود میں پوسٹرز اور بینرز آویزاں کر دیئے۔ترجمان ریلوے کے مطابق ٹرین سٹاف اور اسٹیشن حدود کے عملے کیلئے15 ستمبر 2021 تک ویکسی نیشن کی کم از کم ایک ڈوز اور 15 اکتوبر تک مکمل ڈوز کولگوانا ضروری ہے۔ 15 ستمبر 2021 تک ویکسی نیشن کی کم از کم ایک ڈوز اور 15 اکتوبر تک مکمل ڈوز لگوانے والے مسافروں کو سفر کرنے کے اجازت ہوگی۔ ترجمان ریلوے کے مطابق 15ستمبر کے بعد ویکسی نیشن نہ کروانے والے مسافروں کو ٹکٹ جاری نہیں کئے جائیں گے۔ ویکسی نیشن موبائل ٹیمیں اسٹیشنوں پر موجود ہوں گی ،اگر کوئی مسافر ٹکٹ چیکنگ کے دوران بغیر ویکسی نیشن کے شناخت ہوگیا تو ٹکٹ چیکر اور متعلقہ سٹاف کے خلاف کاروائی ہوگی۔