لاس اینجلس(نیوز ڈیسک) ہالی ووڈ اداکار مائیکل ڈگلس نے انکشاف کیا ہے کہ انہوں نے اپنے بچوں کو اپنی فلمیں دیکھنے کی اجازت نہیں دے رکھی کیونکہ انہیں لگتا ہے کہ ان کے بچے ابھی ان فلموں کو دیکھنے کی عمر کو نہیں پہنچے۔ 70 سالہ مائیکل ڈگلس ہالی ووڈ کے بہترین اداکاروں میں شمار ہوتے ہیں تاہم ان کی بہت سے فلمیں ایسی ہیں جنہیں نمائش کا عام سرٹیفکیٹ نہیں ملا اور انہیں ریٹڈ فلموں میں شامل کیا گیا۔ مائیکل ڈگلس نے اداکارہ کیتھرین زیٹا جونز سے شادی کی جس سے ان کا بیٹا 14 سالہ ڈائلن اور بیٹی 12 سالہ کیریئس ڈگلس ہیں۔ مائیکل کا کہنا ہے کہ ان کے بچوں کو فلموں سے دلچسپی ہے لیکن انہیں یہ واضح طور پر بتا دیا ہے کہ بالغ ہونے کی قانونی عمر تک پہنچنے سے قبل انہیں میری فلمیں دیکھنے کی اجازت نہیں ہے۔ مائیکل ڈگلس کی 90 کی دہائی کے آغاز میں شیرون سٹون کےساتھ بنائی گئی فلم بیسک انسٹنکٹ بہت مقبول ہوئی۔ قتل کی واردات پر مبنی اس فلم میں کئی بیباک مناظر ہیں۔ اس حوالے سے مائیکل ڈگلس نے کہا کہ میرے بیٹے نے یہ فلم دیکھی، مجھے علم ہوا تو میں نے اس سے استفسار کیا جس پر اس کا کہنا ہے تھا اس نے صرف وہ مناظر دیکھے جن میں میں شامل تھا، شیرون سٹون والے مناظر اس نے نہیں دیکھے۔