اسلام آباد۔۔۔۔ وفاقی وزیراطلاعات پرویز رشید نے کہا ہے کہ میڈیا پر اشتہاری مہم کا مقصد تحریک انصاف کے چیرمین عمران خان اور ان کے غیر قانونی دھرنے کو بے نقاب کرنا ہے۔ایک بیان میں پرویز رشید نے کہا کہ عمران خان کا دھرنا آئین اور پارلیمنٹ کے خلاف ہے اور قوم کے ٹیکسوں کے لاکھوں روپے غیر قانونی دھرنے کی سیکیورٹی پر خرچ ہورہے ہیں، میڈیا پر اشتہارات کا مقصد عمران خان اور ان کے غیر قانونی دھرنے کو بینقاب کرنا ہے اور انہیں پتہ ہونا چاہئے کہ اشتہاری مہم کی ادائیگی حکومت نہیں کر رہی۔واضح رہے کہ اس سے قبل سماجی رابطے کی ویب سائٹ پر اپنے پیغام میں عمران خان نے کہا تھا کہ وزیر اعظم نواز شریف اس وقت شدید خوف و ہراس میں مبتلا ہیں جس کی وجہ سے وہ ان کے خلاف اشتہاری مہم چلارہے ہیں اور اس مد میں قوم کے خزانے سے یومیہ 3 کروڑ روپے خرچ کررہے ہیں۔