اسلام آباد(مانیٹرنگ ڈیسک)صوبہ پنجاب کے شہر جھنگ کی تحصیل گڑھ مہاراجہ میں نوجوان لڑکی کو موٹرسائیکل چلاتا دیکھ کر 2 اوباش لڑکوں نے اسے سڑک پر ہراساں کیا اور اس کی ویڈیو بھی بنائی جسے بعد میں سوشل میڈیا پر وائرل کر دیا۔ویڈیو میں لڑکی نے ان بے حس اوباشوں کی منت سماجت کی مگر یہ کسی طور بھی باز نہ آئے اور اسے مسلسل ہراساں کرتے رہے۔ میڈیا رپورٹس کے مطابق اس ویڈیو کے سوشل میڈیا پر وائرل ہونے کے بعد لڑکی نے مبینہ طور خود کشی کر لی۔پولیس نے اس واقعہ کا مقدمہ درج کر کے ایک ملزم کو گرفتار کر لیا تاہم لڑکی کے والدین نے کہا کہ وہ ان لڑکوں کے خلاف کسی قسم کی قانونی کارروائی نہیں کرانا چاہتے۔یاد رہے کہ لڑکی کے والدین مقدمے کی پیروی سے پیچھے ہٹ گئے مگر یہ مقدمہ پولیس کی مدعیت میں درج تھا جس پر کارروائی ابھی بھی جاری ہے۔