شارجہ۔۔۔۔ تیسرے اور آخری ٹیسٹ کے چوتھے روز نیوزی لینڈ کی پاکستان کے خلاف پہلی اننگز میں 690 رنز بنا کر آؤٹ ہو گئی ہے جب کہ کیویز کو گرین شرٹس پر 339 رنز کی برتری حاصل ہو گئی ہے۔
شارجہ کرکٹ اسٹیڈیم میں کھیلے جا رہے میچ کے چوتھے روز نیوزی لینڈ کی ٹیم پاکستان کے خلاف پہلی اننگز میں 690 رنز بنا کر آؤٹ ہو گئی ہے۔ چوتھے روز کھیل کا آغاز ہوا تو مارک کریگ 34 اور ایش سوڈھی صفر پر بیٹنگ کر رہے تھے، مارک کریگ 65 رنز بنا کر محمد حفیظ کا شکار بنے جب کہ ایش سوڈھی 22 رنز بنا کر یاسر شاہ کا شکار بنے۔ پاکستان کی جانب سے یاسر شاہ اور محمد طلحہ نے 4،4 جب کہ محمد حفیظ نے 2 کھلاڑیوں کو آؤٹ کیا۔واضح رہے کہ شارجہ ٹیسٹ میں پاکستان نے اپنی پہلی اننگز میں 351 رنز بنائے تھے جس میں محمد حفیظ کے شاندار 197 رنز شامل تھے جب کہ نیوزی لینڈ کی جانب سے مارک کریگ نے شاندار بولنگ کا مظاہرہ کرتے ہوئے 7 کھلاڑیوں کا شکار کیا تھا۔ نیوزی لینڈ کی جانب سے پہلی اننگز میں کپتان برینڈن میک کولم نے شاندار ڈبل سنچری جب کہ کین ولیمسن نے 192 رنز بنائے۔