اسٹاک ہوم، نئی دہلی(این این آئی)کورونا وبا کے باوجود دنیا بھرمیں فوجی اخراجات میں اضافہ ہوا ہے اوردنیا بھر میں فوجی اخراجات2.6 فیصد اضافے سے 1981 ارب ڈالر تک پہنچ گئے جبکہ عالمی سطح پر جی ڈی پی 4.4 فیصد تک سکڑچکی ہے،غیرملکی خبررساں ادارے کے مطابق اسٹاک ہوم

انٹرنیشنل پیس ریسرچ انسٹی ٹیوٹ کی رپورٹ میں کہاگیاکہ 2020 میں فوجی اخراجات میں لگ بھگ 2 کھرب ڈالر اضافہ ہوا۔دنیا بھر میں فوجی اخراجات2.6 فیصد اضافے سے 1981 ارب ڈالر تک پہنچ گئے جبکہ عالمی سطح پر جی ڈی پی 4.4 فیصد تک سکڑچکی ہے۔دوسری جانب بھارتی وزیر اعظم نریندر مودی نے تسلیم کرلیا ہے کہ کورونا کی لہر نہیں بھارت میں کورونا طوفان آیا ہوا ہے۔بھارتی ٹی وی کے مطابق ریڈیو پر خطاب میں نریندر مودی کا کہنا تھا کہ کورونا طوفان نے قوم کو جھنجھوڑ کر رکھ دیا ہے۔انہوں نے کہا کہ بہت سے بھارتی شہری وقت سے پہلے جان سے ہاتھ دھو بیٹھے ہیں۔واضح رہے کہ بھارت میں کورونا کے مزید 3 لاکھ 52 ہزار مریض سامنے آ گئے، مجموعی تعداد ایک کروڑ 73 لاکھ سے زائد ہو گئی۔ مزید 2 ہزار 688 افراد جان سے گئے، ہلاک شدگان کی تعداد ایک لاکھ 95 ہزار سے زائد ہو گئی۔دارالحکومت دہلی میں لاک ڈاون میں ایک ہفتے کی توسیع کردی گئی۔ جبکہ بنگلہ دیش نے پیرسے بھارت کے ساتھ اپنی سرحد بند کرنے کا اعلان کردیا۔