سکھر۔۔۔۔پاکستان کے صوبہ سندھ کے شہر سکھر میں نامعلوم افراد نے فائرنگ کر کے جمعیت علمائے اسلام فضل الرحمٰن گروپ سندھ کے سیکریٹری جنرل خالد سومرو کو ہلاک کر دیا ہے۔مقامی میڈیا کے مطابق نامعلوم مسلح افراد نے اس وقت خالد محمود سومرو پر حملہ کیا جب وہ مدرسے میں فجر کی نماز پڑھا رہے تھے جس کے نتیجے میں وہ شدید زخمی ہوگئے، انھیں ہسپتال منتقل کیا جارہا تھا کہ وہ زخموں کی تاب نہ لاکر دم توڑ گئے۔واقعے کے بعد ملزمان فائرنگ کرتے ہوئے فرار ہوگئے۔ڈاکٹر خالد سومرو جمعے کو پیغام امن کانفرنس میں شرکت کے لیے سکھر پہنچے تھے۔ڈاکٹر خالد سومرو کا تعلق لاڑکانہ سے تھا۔وہ جمعیت علمائے اسلام فضل الرحمٰن گروپ سندھ کے سیکریٹری جنرل اور سابق سینیٹر بھی تھے۔پولیس کی بھارت نفری مدرسے اور ہسپتال پہنچ گئی ہے۔جے یو آئی سیکرٹری جنرل سندھ کے جاں بحق ہونے کی خبر پھیلتے ہی کارکنوں کی بڑی تعداد ہسپتال پہنچ گئی۔ہسپتال میں خالد محمود سومرو کا پوسٹمارٹم کیا جائے گا جس کے بعد میت کو لاڑکانہ منتقل کیا جائے گا۔