نیویارک(نیوزڈیسک)آسکر ہدایتکار وپروڈیوسرا سٹیون سپیل برگ کی ڈرامے سے بھرپور نئی اسپائی تھرلر فلم” برج آف ا سپائیز” کا نیا ٹریلر جاری کر دیا گیا،سنسنی خیز فلم16 اکتوبر کو نمائش کیلئے پیش کی جائیگی۔3 بار اکیڈمی ایوارڈز جیتنے والے ہالی وڈ کے نامور ہدایتکار و پروڈیوسر اسٹیون سپیل برگ کی ڈرامے سے بھرپوراسپائی تھرلر فلم”برج آف اسپائیز “کا نیا ٹریلرریلیز کر دیا گیا ہے۔ حقیقی واقعات کی عکاسی کرتی اس فلم کی کہانی ایک ایسے ذہین اور نِڈرامریکی وکیل کے گِرد گھوم رہی ہے جسے سی آئی اے سرد جنگ کے دوران سویت یونین کی قید میں ایک امریکی پائلٹ کو بچانے کا ایک مشکل ترین ٹاسک دیتی ہے۔سنسنی خیز واقعات پر مبنی اس فلم میں امریکی وکیل کا کردار ہالی وڈ کے صفِ اول کے اداکار ٹام ہینکس نبھا رہے ہیں جبکہ دیگر اداکاروں میں بیلے میگنوسین، ایلن الڈا، آسٹن سٹوویل، ایمے ریان شامل ہیں۔ڈریم ورکس پکچرزاور ریلائنس اینٹرٹینمنٹ کی تیار کردہ یہ ہسٹوریکل اسپائی ڈرامہ فلم والٹ ڈزنی اسٹوڈیوزاور ٹوینٹیتھ سنچری فاکس کے تحت رواں سال16 اکتوبر سے سنیما گھروں کی زینت بنے گی۔