لاہور (نیوز ڈیسک) سری لنکا کے خلاف ون ڈے سیریز کے لیے پاکستانی ٹیم کے 16رکنی اسکواڈ کا اعلان کر دیا گیا ، طویل القامت فاسٹ بولر محمد عرفان ورلڈ کپ کے بعد پہلی بار ایکشن میں نظرآئیں گے۔پاکستان اور سری لنکا کے درمیان ایک روزہ سیریز کا آغاز 11جولائی سے ہوگا جس کے لئے چیف سلیکٹر ہارون رشید نے اظہرعلی کی قیادت میں 16رکنی قومی ٹیم کا اعلان کردیا۔ قومی کرکٹ ٹیم میں جگہ بنانے والوں میں احمد شہزاد، محمد حفیظ، شعیب ملک، اسد شفیق، سرفراز احمد(کیپر)، بابر اعظم، یاسرشاہ، احسان عادل، انور علی، عماد وسیم، بلال آصف، مختاراحمد، محمد رضوان اور راحت علی شامل ہیں جبکہ ورلڈ کپ کے دوران زخمی ہونے والے طویل القامت فاسٹ بولر محمد عرفان کو ٹیم میں شامل کرلیا گیا ہے۔ان فٹ وہاب ریاض اور حارث سہیل ٹیم سے باہر جبکہ مڈل آرڈر بلے باز عمر اکمل بھی ٹیم میں جگہ نہیں بنا سکے۔نوجوان بلے باز صہیب مقصود بھی زخمی ہونے کے باعث ٹیم کا حصہ نہیں بن سکے۔چیف سلیکٹر ہارون رشید کے مطابق وہاب ریاض اگر فٹ ہو گئے اور ٹیم کو ان کی ضرورت محسوس ہوئی تو ان کے نام پر بھی غور کیا جاسکتا ہے۔پانچ ایک روزہ میچز کی سیریز 11سے 26جولائی تک کھیلی جائے گی۔