لندن (نیوز ڈیسک) پاکستانی ٹینس پلیئر اعصام الحق نے ومبلڈن چیمپئن شپ میں مینز ڈبلز کا پہلا میچ جیت لیا۔ سنگلز میں راجر فیڈرر اور اینڈی مرے تیسرے مرحلے میں پہنچ گئے جبکہ رافیل نڈال کو اپ سیٹ شکست ہو گئی۔ ویمنز سنگلز میں پیٹرا کوویٹوا اور سبائن لیسیکی نے کامیابی اپنے نام کر لی۔ تفصیلات کے مطابق ومبلڈن ٹینس چیمپئن شپ کے تیسرے روز اعصام الحق اور ان کے ڈچ پارٹنر گلز ملر نے مینز ڈبلز مقابلوں کے پہلے راو¿نڈ میں کامیابی حاصل کر لی۔ اعصام الحق کی جوڑی نے بنجامن بیکر اور رابرٹو میٹنزکو سٹریٹ سیٹس میں شکست دی۔اعصام الحق کی جوڑی نے6-3، 6-3اور 6-3 سے کامیابی سمیٹی۔مینز سنگلز کا اہم میچ برطانیہ کے تھرڈ سیڈڈ اینڈی مرے اور نیدرلینڈز کے رابن ہاس کے درمیان کھیلا گیا۔ مرے نے ڈچ حریف کو 6-1،6-1 اور6-4 سے ہرا کے تیسرے مرحلے میں رسائی حاصل کر لی۔ خواتین میں جرمنی کی سبائن لیسیکی نے امریکا کی کرسٹینا میک ہیل کو شکست دے کر تیسرے مرحلے میں رسائی حاصل کر لی۔