اسلام آباد(مانیٹرنگ ڈیسک)نجی ٹی وی پروگرام میں گفتگو کرتے ہوئے سینئر تجزیہ کار حسن نثار نے کہا ہے کہ حکومت کیلئے نواز شریف کو واپس لانا ضروری ہوگیا ہے تو انہیں باہر بھیجا ہی کیوں تھا، شراب کیس میں عتیقہ اوڈھو کے بری ہونے پر انہوں نے کہا کہ اس ملک کے جو مسائل ہیں اور اخلاقیات کا انحطاط اپنے عروج پر ہے وہاں ہمارا مسئلہ دو بوتل شراب ہے جس کا فیصلہ ہونے میں 9سال لگ جاتے ہیں۔ہمارے ملک میں ہر شے اور ہر شعبہ زوال کی زد میں ہے۔

انتہا یہ ہے کہ اس دفعہ عید پر بکروں کو نقلی دانت لگا کر فروخت کیا گیا، ہم تو حلال کو بھی حرام کر کے آگے چلادیتے ہیں۔حسن نثار نے کہا کہ ہمارا مسئلہ یہ نہیں کہ نصاب تعلیم یکساں ہے یا غیریکساں ہے بلکہ یہ ہے کہ ہمارا نصاب تعلیم کیا ہے۔کیا ہم اپنے بچوں کوا ن علوم اور میدانوں میں تیار کررہے ہیں جہاں ہمارا دنیا کے ساتھ گزارا ہے یا مطالعہ پاکستان پر ہی گزارا ہے،حکومت سوچ سمجھ کر نصاب بنائے ورنہ ہم مزید کئی صدیاں پیچھے ہوجائیں گے۔