پریٹوریا(این این آئی)کرونا کی وبا نے چند ماہ کے اندر اندر پوری دنیا میں فضائی آمد ورفت اور فضائی کمپنیوں کے کاروبار کو ٹھپ کرکے رکھ دیا ہے۔ سیکڑوں بین الاقوامی شہرت یافتہ فضائی کمپنیاں اپنے ملازمین کو تنخواہیں دینے میں ناکامی کے بعد ملازمین کو فارغ کرنے پرمجبورہیں اور بعض دیوالیہ ہونے کے قریب پہنچ گئی ہیں۔عرب ٹی وی کے مطابق کرونا وائرس کی وجہ سے دیوالیہ ہونے والی

فضائی کمپنیوں میں جنوبی افریقا کی قومی ایئرلائن بھی شامل ہے۔ یہ کمپنی کوویڈ 19 وائرس کے نتیجے میں سب سے زیادہ متاثر ہونے کے بعد دیوالیہ ہوچکی ہے۔جنوبی افریقا کی قومی ایئرلائن حکومت سے مزید مدد حاصل کرنے میں ناکام رہی ہے جس کیبعد اس نے اپنے 4700 ملازمین کو فارغ کرنے کا منصوبہ تیار کیا ہے۔ یہ فضائی کمپنی 86 سال تک فضائوں میں راج کرتی رہی ہے مگر ایک وائرس نے اسے تباہی کے دھانے پرپہنچا دیا ہے۔اس وقت جنوبی افریقا کی نیشنل ایئر لائن کے کچھ طیارے جرمنی اور برازیل جیسے ممالک میں کارگو سروس کی حد تک محدود ہوگئے جب کہ کمپنی کی معمول کی پروازیں معطل ہیں۔جنوبی افریقا کی قومی ایئرلائن سالانہ بچت اسکیم کے تحت کام کرتی رہی ہے۔ اب کمپنی کے پاس صرف ایک ہی راستہ بچا ہے اور وہ اس کی اندرون اور بیرون ملک موجود املاک کو فروخت کرنا ہے۔کرونا کی وبا سے قبل جنوبی افریقا کی حکومت کی طرف سے بھی اس کمپنی کو امدادی پیکج ملتے رہے ہیں۔ سنہ 2011 کو منافع کمانے کے بعد کرونا نے کمپنی کے تابوت میں آخری کیل ٹھونک دی۔‎