لاہور(این این آئی)آل پاکستان انجمن تاجران کے صدر اشرف بھٹی نے کہا ہے کہ بجلی ، گیس اور پیٹرولیم مصنوعات کی قیمتوں میں اضافے کے رجحان کی وجہ سے تمام شعبے اور اس سے جڑے طبقات شدید مشکلات سے دوچار ہیں ،اسٹیٹ بینک کی جانب سے مانیٹری پالیسی میں

مارک اپ ریٹ میں اضافہ پہلے سے دباؤ کا شکار معیشت کو بری طرح متاثر کرے گا۔اپنے ایک بیان میں انہوں نے کہا کہ حکومت کی جانب سے کاروبار اور معیشت کی ترقی کیلئے پالیسیوں میں تسلسل نہیں لیکن اس کے برعکس مشکلات میں اضافہ کرنے والی پالیسیوں میں تسلسل ہے ۔کاروباری شعبے کے لیے آسانیاں پیدا کرنے کی بجائے رکاوٹیں اور مشکلات پیدا کی جارہی ہیں جس کا براہ راست معیشت پر اثر پڑ رہا ہے ۔انہوں نے کہا کہ مارک اپ ریٹ میں اضافے سے سرمایہ کاری کے رجحان میں کمی آئے گی جس سے کاروباری سرگرمیاں منجمد ہو جائیں گی ۔ اشرف بھٹی نے کہا کہ حکومت کے وزراء ایک پیج پر نہیں جس کی وجہ سے بے چینی کی فضاء ہے ۔ وزیر خزانہ ایک پالیسی کا اعلان کرتے ہیں جبکہ وزیر اعظم کے مشیر ایک نیا اعلان کر دیتے ہیں۔ حکومت معیشت کی ترقی کیلئے مشکل فیصلے ضرور کرے لیکن دباؤ بڑھاکر سانس بند کرنے کی پالیسی سے اجتناب کیا جائے بصورت دیگر حالات کسی کے کنٹرول میں نہیں رہیں گے۔ حکومت سے مطالبہ ہے کہ تمام اسٹیک ہولڈرز سے مشاور ت کا آغاز کیا جائے ۔ اگر حکومت کو معیشت کو مشکلات سے نکالنے کیلئے حزب اختلاف کی جماعتوں سے بھی رابطہ کرنا پڑے تو اس سے دریغ نہ کیا جائے کیونکہ یہ ملک کے مستقبل کا معاملہ ہے اور ہمیں اپنی انا اور مفاد کو پس پشت ڈال کر ملک کے مفاد کو ترجیح دینا ہو گی ۔

موضوعات:اشرف بھٹی