اسلام آباد(آن لائن) وزیراعظم عمران خان سے ق لیگ کے سربراہ چودھری شجاعت حسین نے ملاقات کی ، ملاقات میں سیاسی صورتحال اور حکومتی اتحاد کے معاملات پر تبادلہ خیال کیا گیا، ق لیگ کو وفاق میں ایک وزارت اور ایک کمیٹی کی سربراہی ملنے کا امکان ہے۔ میڈیا رپورٹس کے مطابق وزیراعظم عمران خان سے وزیراعظم ہاؤس میں ق لیگ کے وفد چودھری شجاعت حسین اور طارق بشیر چیمہ نے ملاقات کی۔اس موقع پر ملاقات میں وزیراعظم کے معاون خصوصی نعیم الحق بھی موجود تھے۔

ذرائع کا کہنا ہے کہ چودھری شجاعت نے پاک بھارت کشیدہ صورتحال میں عمران خان کے قائدانہ کردار کی تعریف کی۔ ق لیگی قیادت نے وزیراعظم عمران خان کے سامنے وزراء4 کو بااختیار بنانے کا معاملہ بھی اٹھایا۔ذرائع کا کہنا ہے کہ ق لیگ کو مرکز میں مزید ذمہ داریاں ملنے کا امکان ہے۔جس کے تحت وفاق میں چودھری سالک حسین اور مونس الٰہی کو اہم ذمہ داریاں سونپی جاسکتی ہیں۔ بتایا گیا ہے کہ ق لیگ کو مرکز میں ایک وزارت اور ایک کمیٹی کی سربراہی سونپے جانے کا امکان ہے۔واضح رہے حکمران جماعت تحریک انصاف کی مسلم لیگ ق وفاق اور پنجاب میں اتحادی جماعت ہے۔ اتحادی جماعت ہونے کے ناطے پنجاب میں چودھری پرویزالٰہی کو اسپیکر پنجاب اسمبلی بنایا گیا اور ارکان اسمبلی کو وزارتیں بھی دی گئیں۔وزیراعظم عمران خان اور چودھری شجاعت حسین نے ہرمشکل میں حکومت کے ساتھ کھڑا رہنے کا عزم دہرایا ہے۔ پچھلے دنوں بعض معاملات پرسیاسی اختلافات بھی سامنے آئے لیکن دونوں جماعتوں نے تحمل اور برداشت کا مظاہرہ کرتے ہوئے معاملات کو بڑے احسن طریقے سے حل کرلیا۔ جس کے بعد ق لیگ کے سربراہ چودھری شجاعت حسین نے کہا کہ ہم حکومت کے اتحادی ہیں اور رہیں گے۔ وزیراعظم عمران خان نے پنجاب میں بھی پی ٹی آئی حکومت کو ق لیگ کے ساتھ ملکر تمام سیاسی امور اور عوامی مسائل حل کرنے کی ہدایت کررکھی ہے۔ جس کے باعث پنجاب میں بھی دونوں اتحادی جماعتوں کے درمیان اچھے سیاسی روابط قائم ہیں۔