لاہور (ا ین این آئی) سابق صدر مملکت آصف علی زرداری نے کہا ہے کہ ملک کے نازک حالات کی وجہ سے ابھی تک چپ ہیں ورنہ حکومت کو مشکل میں ڈالنے کیلئے بہت کچھ کر سکتے ہیں ،موجودہ وفاقی حکومت صوبوں کے حقوق غصب کر رہی ہے، سندھ اور بلوچستان کے مالی وسائل نہیں دیئے جا رہے ،پنجاب میں بھی اپوزیشن ارکان کو ایک نلکہ تک نہیں دیا جا رہا۔
پنجاب میں سیاست بدلے گی، قائدین عوام کے ساتھ رابطے بڑھائیں، میں خود بھی جلد جنوبی پنجاب سے دوروں کا آغاز کروں گا۔ان خیالات کا اظہار انہوں نے بلاول ہائوس لاہور میں پیپلز پارٹی پنجاب کی قیادت سے گفتگو کرتے ہوئے کیا ۔ ملاقات کرنیوالوں میں پیپلز پارٹی پنجاب کے صدر قمر زمان کائرہ ،سینئر نائب صدر چوہدری اسلم گل اور سیکرٹری اطلاعات سید حسن مرتضیٰ شامل تھے ۔اس موقع پر ملک کی سیاسی صورتحال، پنجاب کی تنظیمی اور سیاسی سرگرمیوں پر تبادلہ خیال کیا گیا ۔ اس موقع پر آصف علی زرداری نے کہا کہ موجودہ وفاقی حکومت صوبوں کے حقوق غصب کر رہی ہے، وفاق سندھ اور بلوچستان کے مالی وسائل نہیں دے رہا، مجھے پتہ ہے کہ پنجاب میں بھی اپوزیشن ارکان کو ایک نلکہ تک نہیں دیا جا رہا ۔ انہوں نے کہا کہ ملک نازک دور سے گذر رہا ہے اس لئے ابھی ہم چپ ہیں، سیاست کرنے پر آئیں تو بہت اچھا کھیل سکتے ہیں، ملکی حالات اجازت نہیں دے رہے کہ پارٹی سیاست کریں، حالات اجازت دیتے تو حکومت کو مشکل میں ڈالنے کیلئے بہت کچھ کر سکتے ہیں۔ آصف زرداری نے کہا کہ ہم نے پہلے بھی ملکی سلامتی کیلئے قربانی دی اب بھی دیں گے ، پنجاب میں سیاست بدلے گی، قائدین عوام کے ساتھ رابطے بڑھائیں، میں خود بھی جلد جنوبی پنجاب سے پنجاب کے دورے کا آغاز کروں گا۔انہوں نے کہا کہ پی پی پنجاب لاہور میں او آئی سی کی سالگرہ پر مبارکباد کی مستحق ہے، پنجاب اسمبلی میں ہماری تعداد کم سہی مگر آواز توانا ہے۔علاوہ ازیں سابق صدر آصف علی زرداری سے بلاول ہائوس میں ذکاء اشرف نے اہلخانہ کے ہمراہ ملاقات کی ۔اس موقع پر مختلف امور پر بات چیت کی گئی ۔
